هل فعلا الصين بتتجسس علينا🤔

▪ باحثين في شركة Check Point نشروا تقرير مفصل امبارح عن حملة تجسس إلكترونية بتقودها الصين باستخدام جروب هاكرز معروف باسم Naikon APT.

التقرير كشفت بعض الدول المستهدفة ومنها (استراليا - إندونسيا - الفلبين - بروناي - فيتنام - تايلاند - ميانمار) وعملية التجسس فضلت شغالة لمدة 5 سنوات من 2015.

▪ الصين كانت عملت مقر الاتحاد الإفريقي الموجود في أديس بابا وتولت عملية هندسة الشبكات والخوادم وكل ما يتعلق بالجزء الإلكتروني كهدية لإفريقيا.

بعدها بسنوات اكتشف عاملين في الاتحاد إن المباني كلها مزروعة ميكروفونات تجسس.. ومهندسين الشبكات لقوا إن السيرفرات كل يوم الساعة 12 بالليل بتستهلك طاقة بكمية كبيرة وحرارتها بترتفع بشكل غريب بالرغم إن مفيش موظفين ولا شغل.

لما عملوا فحص اكتشفوا إن الخوادم اللي في مقر الاتحاد بتبعت البيانات (اللي بيتم جمعها من التجسس على أعمال واجتماعات الاتحاد الافريقي) وإرسالها لخوادم موجودة في شنجهاي - الصين.

▪ شايفين الشريحة اللي في الصورة دي اللي معمول عليها زووم كتير عشان تظهر.. هي في الحقيقة حجمها يساوي حجم حباية الرز.

مجلة بلومبيرج نشرت تقرير في 2018 إن الشريحة دي كانت مزروعة في خوادم اتباعت لحوالي 30 شركة أمريكية من ضمنهم أمازون وآبل وتم استخدامهم في مراكز البيانات الخاصة بالشركات دي.

برضه الشركة باعت سيرفرات مدمج فيها الشريحة دي لبعض الجهات الأمنية الحساسة ومنها وزارة الدفاع الأمريكية ووكالة الاستخبارات.

الأجهزة دي كانت من تصنيع شركة Supermicro الأمريكية لكن عمليات تجميعها كانت في الصين.

على فكرة.. أنا ممكن أكتب أمثلة من هنا للصبح.. ومش محتاج أشرح حاجة لأني أعتقد إن اللي عايز أقوله وصل.

المصدر : https://www.cfr.org/blog/african-union-bugged-china-cyber-espionage-evidence-strategic-shifts?fbclid=IwAR0XWt9wVuYXj3jlsos033okMlf5CkMi1WymbezgrxSzODJMzd7mpfycuB4